Aizawl: Mizo Students’ Union (MSU) chuan nimin khan an pawl din champha, rising day vawi 24-na an hmang a. He hun hi Higher & technical Commissioner & Secretary H Lalengmawia’n khuallian niin a hmanpui.
Khuallian chuan zirlai hruaitute chu harsatna leh manganna avanga beidawng ngai lo turin a fuih a. Mizote zingah civil service an tlem tawh avangin tan la turin zirlaite a chah a. MSU hruaitute zinga a lo tel ve thin tawh avanga a inchhuan thu a sawi bawk.
MSU President B.Lalkhawngaihzuala pawhin thu sawiin MSU chuan zirlaite tanpui chu a tum ber a nih angin school session tan leh dawna admission fee-a harsatna neite chu theihtawpa tanpui zel an tum thu a sawi a. Ram leh hnam humhalh chu an pawl dinchhan pakhat a nih avangin theihtawpa ram leh hnam tana ke an pen zel dawn thu a sawi.
Prof. JV Nungchunga Sr.Adviser paw’n MSU hruaitute hnenah fuihna thu sawiin MSU chu zirlaite tan, Mizo chi peng hrang hrangte inpumkhatna atan leh Mizoram leh hnam tana dinna chhan nei a nih angin ding tlat turin a fuih a. Hleprukna leh dik lohna laka inthiarfihlim tlat turin a fuih bawk.
I&PR Auditorium-a hun hmanah hian Samuel Lalruatdika, General Secretary leh Lalruatpuia, Assistant General Secretary ten thu an sawi bawk.