Ruahman lawk angin Mizoram district pakua-a village council leh local council inthlanpui chu nimin khan tluang taka neih a ni.
Village council leh Aizawl leh Lunglei-a local council inthlan hi nimin zing dar 7 atang khan harsatna leh buaina awm lovin vote thlak tan niin, tlai dar 4 thleng vote thlak theih hun hawn ni mah se, hun tiam chhunga vote la thlak lo polling area thenkhatah, mi eng emaw zat awm an la awm a, heng mite hi vote thlak zawhtir vek an ni.
Vote tlate hi nizan dar 7 atang khan chhiar tan niin, hun tiam chhunga vote thlak zo lo an awm a nih chuan vote thlak zawh atanga darkar chanve hnuah chhiar nghal tur a ni.
Vote thlak that ngai an awm a nih chuan vawiin hian vote thlak that a ni ang a. Vote tlate hi zan dar 7 atanga chhiar tan leh nghal tur a ni bawk.
Tun tum LC/VC inthlana chakna changte chuan February 14, 2025-ah executive body siam fel tura tih an ni a. February 15, 2025-ah he inthlan kaihhnawih zawng zawngte chu zawh fel vek tura tih a ni.
Kum 2015 atanga village council term kum nga chu chhunzawm zelin kumin inthlanah pawh term hi kum nga ni tura ruahman a ni.
Tar tawh angin, tun tum VC leh LC inthlanah hian VC 544 awmah seat 2,416 a awm a, village council hnuaiah hian hmeichhe seat reserve 613 a awm a ni.
Aizawl Municipal Corporation leh Lunglei Municipal Council hnuaia LC 111 awmah seat 723 a awm a, a pum puiah vote nei mi 4,39,409 an awm a. Local council hnuaiah hmeichhe seat 195 a awm bawk.
AMC huam chhungah kumin January thla khan local council thar pahnih – Bawngkawn West leh Tlangnuam West-te pian belh lehin, tun tum local council inthlanpuiah hian local council 87 a awm ta a ni.