Japanese finance ministry-a thawktu pakhat chuan a thawhpuite nena zana intihlima an chhuahvahnaah ruihhlo tawlh nia an rinhlelh mi 187-te chanchin ziahna chu a tibo niin tual chhung chanchinbuten an tar lang.
Thawktu hi a hming puan a ni lo va, February 6 zan khan an khawpui, Tokyo chhim lama Yokohama-ah a thawhpuite nen hian darkar nga leng chhuakin beer no kua a in nia sawi a ni.
Tual chhung chanchinbute chuan a ip a tibo tih hi Tokyo bul mai tho, Sumida-a rela a chuan thlena a chhuk hnuah chauh a hre chhuak a ni tih an tar lang.
Finance ministry chuan he thil thleng hi ‘pawi an ti tak zet’ tih an sawi a, ‘vantlang rinawmnaah an innghat’ tih sorkar broadcaster NHK chuan a tar lang.
A ip chhungah hian lehkha pawimawh tak tak awmin ruihhlo tawlh thin nia an hriat mi 187-te hming leh an chenna bakah marijuana chi chi hrang hrang pawh a tel niin an sawi.
Business laptop pawh bo telin hetah hian a tibotu nihna chiang tak pawh a awm niin an tar lang.
A tibotu hi customs and tariff bureau-a thawk lai niin a hming hi NHK chuan a puang lo.
Japan-ah hian zu hi kum sang chuang kal tawh atangin vantlang intihthawlna ber niin inkawmnaah an in nasa a, hah taka hna an thawh leh harsatna an neih hian beer leh zu in an ching a, chhawktu-ah an ngai a ni.
Zu an in in hian an hahdam sawng sawng a, an ngaihtuahna pawh a fim sawt thin niin an sawi.