Mizoram a kohhran liante zinga mi Mizoram Thalai Kristian Pawl (MTKP) chuan kum li liamtaa an rorelna sang an neih tum khan fa neih tam inzirtir kawnga hmalak an rel a. An member te chu fa nei tam tura inzirtir chhoh an tum a ni. Tunah inkhawmpui lian nei leh mekin, he an rorel hi a hlawhtling chho zel em tihte pawh a hriat zual turah ngai ila.
Hun hmasa lamah khan MZP lam pawhin fa nei tam tura inzirtirna hi lokalpui tawhin, an member te chu fa neih tam a tulzia an lo fah tawh a. Mahse, pawl mal leh kohhran mal ngawta hmalakna hi chu a sawt mawh em avangin kan tanho thiam a ngai khawp mai.
Mizote hi hnam tlemte kan la ni a, kan chhehvelah hnamdang leh sakhaw dang betute an tam em em mai a, heng mite hian fa an nei teuh teuh a, kan ram ngeiah pawh an tamzia kan lo hriat phah ve tak hial hi! Anni chuan engmah ngaihtuah lovin fa an nei a, mahse tam na na na chuan kan huai a, mi nek turin tam a ngai bawk a, kan tam chuan ram hauh pawh kan ti na nge nge thin. Kan chhehvel hnamdangte atang hian chhut ve mai rawh.
MTKP ten fa neih tam an inzirtir chhohna pawh khan rah duhawm a chhuah ngeiin a rinawm a, kan sakhaw inzirtirna hmangte hian fa neih tam thatzia chu i chharchhuak thar tak tak tawh teh ang u. Kohhran leh tlawmngai pawl dangte pawh hian fa nei tam tura inzirtirna hi kalpui chho zui zel thei zel se la, chu chu kan ram leh hnam hma hun zel atan pawh a tha tih hria in, hma i la tak tak hlawm ang u.
Fa nei tamte chawimawina lam pawh hi sorkar hian uar se la, fa neih tam thatzia inzirtirna thlengin kalpui nasa bawk se la, sorkar nen tangruala kan thawhho that phawt chuan kan hma hun chu a eng ang a, kan huaisenin, hnamdang nek ngam loh khawp thlengin kan insiam lian thei ngei ang.