Aizawl: Mizo National Front (MNF) chuan thuchhuah siamin tun dang local/village council inthlan neih tawha ruling party chakna an chan thin dan khaikhinin, ZPM-in tlakhniam lam an pan zel tih a tar lang chiang hle niin an sawi.
MNF chuan sorkar thar phur vanglai leh an kal thui hmaa inthlan hmachhawn an ni tih sawiin, tum dang LC/VC inthlan neih tawha ruling party-ten chakna an chan thin dan nena khaikhinin, tun dinhmuna MNF-in chakna an chan dan thlirin a lawmawm an tih thu sawiin, “He inthlan result hian ZPM party chu mipuite rilruah tlakhniam lam nasa takin an pan zel tih a tarlang chiang hle,” an ti.
VC/LC thlan thar zawng zawngte chu kalphung thar mipui sorkar an zawrh ang ngeiin, mipui tan thlei bik awm lova hnathawk thei turin thuam chak se, thuneihna semzai kawnga mipui sorkar din an tum chu thlan tharte hmang hian a takin hmang nghal tawh se an duh takzet thu an tar lang bawk.
MNF chuan ZPM sorkarna hnuaia hnawhsarum zeta Village/Local council inthlanpui neih zawh taka thlan tlin ni ta zawng zawngte lawmpui tak zet thu leh, tling zo ta lote chu a tawrhpui takzet thu bakah, MNF party tana nghet taka ding a, MNF candidate zawng zawngte a chhuangin, an thawhrimna leh inpekna fakawm an tih thu an tar lang bawk.