Brazilian sorkar chuan Inrinni khan BRICS summit neih leh tur chu July 6-7 chhungin Rio de Janeiro khawpuiah an thleng dawn tih a puang.
Brazil hi kum 2025 chhunga ram thang mekte inzawm khawma chair nihna chelhtu a ni a. An pawl hi khawvel chhim lama sorkar tha a awm theih nan leh thawhhona tha a awm theih nana hma latu a ni tih sorkar thuchhuah chuan a tar lang.
BRICS hi kum 2009 khan Brazil, Russia, India leh China ramten an din a ni a, South Africa-in kum 2010 khan zawmin khawvel ram changkang tawh leh thang chak tak, Group of Seven do let tura indin an ni ber.
Nikum khan Iran, Egypt, Ethiopia leh United Arab Emirates (UAE) ramten an belh leh a. Saudi Arabia pawh zawm tura sawm a ni a. Turkey, Azerbaijan leh Malaysia ramte pawhin member nih ve an dil a, anni lo pawh ram dang eng emaw zatin tel ve an duh thu an lo sawi tawh thin.
Tun hnai khan tangrual pawl hian Indonesia chu an member 11-na atan an lawmlut a, Kazan-a 2024 summit-ah khan Nigeria chu an ‘thawhpui ram’ a nih thu an puang bawk.
Brazil chuan summit an thlen turah hian an thawhpui ramte pawh tel ve turin an sawm nghal a, an thawhpui leh member ni chiah lo, an thu khel turin a nghawng theih ram dang aiawhte pawh chhim tura sawm an ni bawk.
“Hmasawnna, thawhhona leh heng kan member rama chengte changkanna tur thutlukna tam tak siam a ni ang,” tiin Brazilian Foreign Minister Mauro Vieira chuan a sawi.
Hetih lai hian US President Donald Trump-a chuan BRICS ramte hian an ram pawisa a tlakhniam theih nana hma an la a nih viau chuan heng ram atanga bungrua an lak luhna man chu a leta tihpunah a vau mek a. BRICS hruaitute chuan a remchannaah chuan sum inpek tawnnaah dollar-a innghah zel an tum thu an la sawi rih thung.