February 16, 2025 hi Kristian Thalai Pawl (KTP) Day a ni a, Central KTP chuan hun eng emaw chen atang khan a hman dan tur hrang hrang a siam a – Biak In hung chhung hmun remchang laia KTP Flag tar, Biak In leh a vel tihfai, veng chhung tihfai, mi harsa leh damlote tanpui, thisen pek leh a remchan anga KTP thil tum leh thupui zir ho tih te an ni a, heng bakah hian branch-in mahni remchan dan angin an hmang thin bawk.
Provisional Committee-in Synod Standing Committee-ah KTP din an dil a, committee chuan February 16, 1954 khan a pawm a, Synod Standing Committee-in KTP a pawm ni hi KTP din hunah pawm a ni ta a, KTP a din atanga an committee hmasak ber hi February 22, 1954 a ni.
March 2023 – February 2024 chhung report-a a lan danin, Central KTP hnuaiah KTP Branch 904 awmin member zawng zawng 1,71,404 (mipa 1,04,736 leh hmeichhia 66,668) an awm a ni.