- K. Hmingthankaia
Electronic Voting Machine ( EVM) kan hmanna a lo rei leh ta deuh a, Ballot paper kan han hmang leh thut kha chu, Election buaipuitu lam in mipui zirtirna an pe tha tawk lo deuh ka ti. Mahse, tunhma angin chhut nawn kha vote thi a ni chuang tawh lo an tiin ka hria a, a ziaawm tho e.
VC/LC inthlan hi Party len zawng tehna pakhat chu ni ve bawk mah se, tehna lian ber leh rintlaka hman chi chu a ni hauh lo. MLA-ah chuan tu party tan pawh a dang leh daih thin. Mipuiin kan Veng, kan Khaw bil enkawl tura kan mi thlan chhan tlangpuite chu hetiang deuh hi a ni thin.
- Kan laina leh hmelhriat tha, kan mi ngainat zawngte.
- Vengchhunga mi rethei leh mi hnuaihnung te te, mi mawl ber pawhin kan ban phak tawk tur nia kan hriatte.
- Mahni Vengchhung hrechianga, mitin mil tawka khawsa thiam leh, mi inngaitlawm, viak tha si. Tute pawh be peih leh kawm thei vekte.
- Vengchhung tana inhmang peih mi, Vengchhung levela hruaitu nih inhria, chapo lo tur, boruak dang hap tum tlat lo tur, Vengchhung hruaitu nihna levela lungawi, Vengchhung atchilhtu leh, Veng tan chauha inpe mi, thil te tham thlenga ngaihven mi.
- Vengchhung thatna chauh duh mi. Veng hruatu nihna remchanga hmanga, mahni hlawkna tura hotute leh Department leh Office lam dawr reng tur ni loa kan hriatte.
- Tute pawhin kan tlawhpawh ngam leh, engpawh kan zawh ngam leh fiam ngam, kan hauh bawrh bawrh ngam turte hi Veng mite hian kan thlang chak thin a ni.
Chuvangin, tuna kan Veng, kan Khua enkawl tur leh hruaitu tur kan thlantlinte pawh hian, Party base taka thlan in ni lo tih hriain, Party rival, party inep boruak nei lovin, lungrual taka thahnemngai taka Veng leh Khaw tana thawk ho turin ka ngen a che u.