Aizawl: Mizoram State Election Commissioner Dr H Lalthangliana chuan Zirtawpni khan March 12, 2025 khian Chakma Autonomous District Council (CADC) hnuaia village council inthlan neih a nih tur thu a puang a, Model Code of Conduct pawh hman tan nghal a nih thu a sawi.
CADC hnuaia VC inthlanna hi March 12, 2025 zing dar 7 atanga tlai dar 4 thleng vote thlak tur niin, vote thlak zawh veleh vote tlate chhiar chhunzawm nghal a ni ang.
CADC hnuaia Village Council Constituency 88-ah hian general seat 428 leh reserved seat 88, a vaiin seat 516 thlan tur a ni.
He inthlannaa VC candidate turte tan February 19, 2025 hi hming pek theih hun tawp ni a ni a. February 21, 2025 ah hming pe lut te endik an ni ang a, he inthlannaa hming pe lut inhnukdawk tan February 24, 2025 thleng hun hawn a ni.
Vote thlak that ngai an awm a nih chuan March 13, 2025-ah inthlanna buatsaih tur niin, hemi ni vek hian vote tlate chhiar nghal tur a ni a. Inthlana tlingte chuan March 17, 2025 hma ngeiin executive body din tura tih a ni a. CADC VC inthlan kaihhnawih zawng zawngte chu March 18, 2025-a zawh fel vek tura tih a ni bawk.
CADC hnuaia VC electoral roll hi January 9 – 27, 2025 chhung khan en nawn hna thawh a ni a. Final Electoral Roll hi February 10, 2025 khan tihchhuah a ni a. Final electoral roll-ah hian vote nei thei mi 37,883 an awm a, heng zinga mi 19,162 hi mipa niin, 18,721-te hi hmeichhia an ni a, household hi 16,991 a ni.
CADC huam chhungah hian VC chhunga in 50 awm chinin V/C seat 3, in 51-100 in seat 5, in 101-150 in seat 6 leh in 151 atanga chung lamin seat 7 zel an nei thei a ni.