Aizawl: Mizoram University Alumni Association (MIZUAA) hruaituten Inrinni khan Aizawl Press Club-ah thu thar thehdarhtute an kawm a, India rama university tha leh tha lo tehtu, NAAC-in an tehnaah Mizoram University (MZU) chu Grade ‘A’ hmu chho zelin, tehna hrang hranga tehin university tha pawl a la ni tih an sawi a, dinhmun sang zawk luah turin mipui an pawimawh tih an sawi.
MIZUAA President Dr Henry Zodinliana Pachuau chuan kum 2011-a din, MZU hnuaia pawl peng hrang hrang awmah MIZUAA hi a pawimawh berte zinga mi an nih thu leh UGC-in a phut angin nikum khan society angin an inziak lut thlap tawh thu a sawi a. Kum 2001 atanga MZU atanga zir chhuak tawh hrim hrim chu an pawlin a huam vek thu a sawi.
MIZUAA hi MZU atanga zir chhuak tawhte tana pawl din a nih thu sawiin, an hnuaiah hian Mizo chhenfakawm tak tak te, hna hrang hranga nihna pawimawh tak tak chelhte an awm nuai tawh a. MZU product ngei hlawtling taka an awm chhote hi an chhuan thu sawiin Dr Henry Zodinliana Pachuau chuan, “He university hian dinhmun sang zawk luah turin mipui an pawimawh a. He university hian hma a sawn theih zelna turin zirlaite leh zirlai chhuak tawhte an pawimawh a ni,” a ti.
Dr Henry Zodinliana Pachuau chuan tunah chuan zirlaite an pawimawh avangin an fund pek dan pawh an thlak tih sawiin, “Membership fee Rs. 500 a ni a. Kum 2001-2019 thleng kha chu a duh apiangin a pek anga kal kha a ni. Kum 2020 atang khan kan hotuten remruatna tha zawk neiin, zirlai, an zir zawh hmaa fee an pek apiangin MIZUAA fund hi pek nghal ngei ngei tura tih a ni tawh,” a ti bawk.