Chief Minister Lalduhoma chuan ramin hma a sawn zel theih nana sorkar kutke ber chu sorkar hnathawktute an nih avangin sorkarin a hnathawkte chungah a thikthu a tichhe hma bik tih a sawi.
Inrinni khan chief minister hian Sericulture Minister Lalthansanga, Aizawl East I bialtu MLA ni bawk nen Zemabawk North-a Sericulture Complex an tlawh a. Sericulture chu department pawimawh tak a nih thu leh Mizoram ei leh bar chawi kan nana hmanraw tangkai ber an nih theih thu a sawi.
Sorkar laipui pawhin sericulture chu a ngaih pawimawh thu sawiin project eng emaw zat bawhzui tura ruahmanna an siam mek thu a sawi.
Lalduhoma chuan mipuiin sericulture hmanga eizawn an uar theih nan tun aia nasa lehzuala inzirtirna neih a tul thu a sawi a. Sorkar tharah chuan sorkar hnathawk inthlahdah bik an awm a rem loh thu sawiin, “Kan ramin hma a sawn zel theih nana sorkar kut leh ke ber chu sorkar hnathawkte an nih avangin sorkar chuan a hnathawkte chungah pawh a thik thu a tichhe hma bik a ni,” a ti.
Sericulture minister pawhin department hmalakna leh hmachhawp hrang hrangte thawktute nen uluk takin an en ho thin a, tunah pawh hian hmachhawp lian tak tak an nei mek tih a sawi a. ZPM au hla ber, eizawnna ngialnghet zawk neih theih nana an hmachhawp zingah pawh sericulture hi a tel a, ramngaw thiat zawng ni lo, ramngaw siam belhna a nih avangin a hlawkna hi kawng hnihin ramin a tel thei tih a sawi bawk.
Chief minister leh sericulture minister hian Sericulture Complex chhunga department hmalakna hmun hrang hrang an enfiah a. Thawktuten an hnathawh dan te an lo hrilhfiah a ni.