Aizawl: Eco Savoir Foundation, Kolkata-in CSR kaltlanga District Hospital, Serchhip tana ultrasound khawl thar an pek chu nimin khan Chief Minister Lalduhoma’n a hawng.
Kawnpui VC Hall-a ultrasound khawl thar pek lawmna inkhawmah chief minister chuan CSR tangkai theihzia hrechiangtu chu Serchhip mipuite an nih thu a sawi a. District Hospital, Serchhip building an sak theihna bul ber pawh CSR a nih thu sawiin, “CSR hi Companies Act dan hnuaia mi, sorkar sum seng lova hmasawnna hna tam tak thawh theihna hnar a ni. A hmang tangkai thei tur hian Society emaw, NGO, Income Tax 12A & 80G registration nei nih a ngai a. He registration nei NGO kan ngah a, anni’n thawhpui tur company an dap chak chuan kan ram tan hlawkna tam tak kan hai lut dawn tihna a ni,” a ti.
Chief minister chuan sorkarin a pawimawhzia an hriat avangin chief minister office-ah CSR Cell an din tih a sawi a. UNDP nena tang dunin Bangalore-ah CSR Conclave te an zu buatsaihin, hetah hian CSR pe thin company lian thahnem tak an zu kawm a. Mizorama hetiang lama tui mite pawh ko khawmin Awareness Programme an buatsaih tawh a. Conclave lian tham nei turin an inpuahchah leh mek tih a sawi.
Serchhip damdawi in chu an theih ang angin an thuam mek thu leh, hospital building thar sak meka harsatna awm te sukiang turin hma an la zel tih sawiin chief minister chuan, hospital chauh pawh ni lovin, nursing school tur building sak tawh vawiin thlenga la hman tangkai si loh hman theiha siam an tum thute, Serchhipah sorkar quarter sak belh nual an tum thu leh, Circuit House pawh Rs. vbc 6 senga sak an tum thu a sawi bawk.
Sr CMO Dr LP Malsawma kaihhruai inkhawmah hian Eco Savior Foundation State Head, C Lalrinfela pawhin thu a sawi a ni.
Eco Savoir Foundation-in CSR kaltlanga District Hospital, Serchhip tana Ultrasound khawl thar an pek hi, Samsung V6 Ultrasound niin, Rs. nuai 49 man a ni.