Manchester United boss Ruben Amorim chuan Tottenham hneh lova Premier League-a 15-na an nih hnuah a hna chu ‘a harsa tak zet’ tih a sawi.
Portuguese coach hi league-a a inlan vawi 12-ah vawi riat nan a tlawm ta a, James Maddison-a’n minute 13-a Spurs tana goal a thun chu an sut thei lo tluan a, Pathianni zan khan 1-0-in an tlawm.
Red Devils hian harsatna nasa tak an tawh karah Amorim-a hian hliam player 12 lai a nei a, hei vang hian Spurs lakah pawh naupang tak tak bench a luahtir.
Kum 40 mi, Amorim-a hian United a zawm hnuah inkhelh zawha thuthar lakhawmtute kawm huphurhawm tak tak a lo hmachhawn tawh thin a, Pathianni zanah pawh a dang chuang lo.
“Harsatna tam tak ka nei a ni,” tiin Sky Sports hnenah a sawi a. “Ka hna hi a harsa a; mahse, karlehah pawh ka inrinna nen ka thawk chhunzawm ang a, chak leh tumin ka bei ang,” a ti.
Spurs lakah hian minute 70 zet si phur mah se Amorim-a hian hun pek belh minute khatna thlengin tumah a thlak lo va, kum 17 mi, Chido Obi a luhtir.
Forward hi bench-a rawlthar pariat a thuttir zinga mi a ni a, Amorim-a hian a la naupan em avangin ama hmasawn zelna atan hun tam tak khelhtir chi a la ni lo tih a sawi.
“Khawvela inelna hautak ber a ni,” a ti a. “Fimkhur taka tih ka tum a, goal thun ngei tumin kan bei niin ka hria a, inthlak pawh kha ka duh lo a ni,” a ti.
“He hmunah hian ka player-te pui turin ka awm a. Ka dinhmun, ka hna ka hre chiang a, ka hnaah ka inring tawk a, chak chauh ka duh,” a ti.
“Table-a kan dinhmun hi pawi ka ti a, keimah erawh ka inngaihtuah lem lo,” a ti bawk.