Aizawl: Ningani khian AR Lammualah ram pum huap tawngtai beihpui chu State Day of Prayer Committee chuan a buatsaih dawn. He hun hmanpui turin mi zawng zawng an sawm.
Nikuma hlawhtling taka ‘State Day of Prayer’ buatsaih a nih hnuah, kumin hian State Day of Prayer Committee-in ram pum huap tawngtai beihpui an buatsaih leh dawn a. Tun tumah hian ‘I Ram Lo Thleng Rawh Se (Matthaia 6:10)’ tih chu thupuia hman a ni dawn.
AR Lammuala State Day of Prayer hman turah hian, chawhma lamah committee chairman Rev Dr K Thanzauva’n kaihruaiin, chief minister Lalduhoma’n thu a sawi ang a; chawhnuah Working Chairman F Rodingliana kaihhruaiin, Frederick Lalrindika’n thu a sawi ang.
Chawhma lam leh chawhnu lamah mipui tawngtaihona vawi thum ve ve a awm ang a; zaipawl an zai ve ve bawk ang. Political party MLA nei chinte aiawhin thusawi tawi an nei theuh bawk ang. Tawngtai thupui tur ziahna leaflet chu a hmunah sem a ni ang.
State Day of Prayer Committee chuan tlawmngai pawl, NGO zawng zawng te leh Zofa ringtu mipui zawng zawngin Lammual bakah, an awmna khua zawng zawngah hemi ni hi Pathian hnenah lawmthu sawiin, sual thupha chawiin, Mizoram sorkarahte, office tinah te, sumdawnna leh eizawnna hmun tinah te, zirna hmun tinrengahte leh Kohhran zawng zawngin Lalpa hnena tawngtaina nia hmang a, inhlan theuh turin an sawm a ni.