Aizawl: Mizoramin infiamna kawnga hma a sawnna turte sawi dunin Larsap Vijay Kumar Singh leh Sports Minister Lalnghinglova Hmar te nimin khan an inkawm.
Raj Bhavan-a an inkawmnaah larsap chuan Mizoramin football piah lamah infiamna hrang hrangah hmasawn theihna sang tak a neih thu sawiin, union sports minister a lo biak tawh thu te, Mizoramin Vision Olympics 2036 a neih avanga lawmawm a tih thute a sawi bakah, sipai lamah pawh a tul anga thawhpui tur a lo zawn tur thu a sawi.
Sports Minister Lalnghinglova Hmar chuan Mizoramin infiamna lama hma a lakna kawngah state flagship programme ‘Bana Kaih’ hnuaiah Empowering Mizoram Sports an kalpui tur thu te, thingtlang hrut chhuaka sports lama talent zawn chhuah hna kalpui tura ruahmanna an neih dante a sawi a. Mizoram hmathlirte tihpuitlinna kawngah theihtawp chhuahpui turin larsap sawmin, a tawn hriat pawimawh leh hnathawh tawhnate chu Mizoramin a chhawr tangkai ngei a beisei thu a sawi.
Lalnghinglova Hmar chuan ruihhlo do kawngah sports a tangkai thute leh eizawnna a nih chhoh mek thute larsap hi a hrilh bawk.