Steph Curry chuan Chase Center, San Francisco-a NBA All-Star Games kalphung tharah Kobe Bryant MVP atan thlan niin Shaq’s OGs chu All-Star nomawi a lakpui bawk.
NBA hian All-Star Game an kalpui thin dan chu kuminah hian thlakin kalphung tharin an khel a. Team pahnih ni thin chu pali ni tawhin an player hlui hriat hlawh tak takte theuhvin an kaihruai (coach) a. Vawi khat khelha chak loh tlak nghala khelin semifinal pahnih leh championship game a awm.
Kum 36 mi, Curry hian final-ah point 12 vawm lutin Chuck’s Global Stars lakah a team chu 41-25-in hnehna a chanpui.
“Ka hlim tak zet a ni,” a ti a. “Nikum lakah thil danglam tak a awm a, kawng dikah ke kan chhep a, thil thar a awm a, tute pawhin lan chhuah that kan tum theuh a ni,” a ti.
NBA champion vawi li lo ni tawh, Shaquille O’Neal-a kaihhruai champin team-ah hian NBA champion vawi hnih lo ni tawh Kenny Smith, vawi 11 All-Star-alo tel tawh Charles Barkley leh WNBA champion vawi thum ni tawh Candace Parker te pawh team enkawltu zingah an tel.
Curry hian inelnaah hian point 20 a thawk chhuak a, semifinal-a Candace’s Rising Stars laka 42-35-a hnehna an chanah point riat a thawk chhuak bawk.
Golden State Warriors point guard hi NBA chanchina vawi khat aia tam All-Star MVP ni thei 15-na chiah a ni.
Ngaihdan inang lo
Indianapolis-a 2024 All-Star game-ah khan team hnih point hmuh belhkhawm kha point 397 zet a ni a, a huaihawttute chuan inelna tak tak deuh zawk a awm theih nan a khelh dan phung her danglam hret a ngai niin an hria.
Kalphung thar angin tournament tenau an huaihawt a ni ta deuh ber a, semi-final pahnih leh final a awm ta a. Hei baka tihdanglam lian tak chu point 40 vawm lut tling hmasa sa chak zawk tih a ni a, a hmaa quarters li khelh kha tihbo a ni.
MVP Curry chu NBA-in thil a kalpui faktu zingah a tel a. “Eng emaw kawng zawng taka he infiamna chawi kanna chi khat atana rahbi dik niin ka hria,” a ti.
Curry-a hova champion team-a tel, Milwaukee Bucks guard Damian Lillard pawhin tha a tih thu a sawi ve bawk.
“Inelna tak tak deuh zawk a awm leh chutiang siam tumna rilru atang chuan tun hnai kum liam tate lakah chuan inelna pangngai tak a ni,” a ti.
“A hlimawm zawng leh a inelna ang zawnga kalpui kha tum ber a ni a, chutiang thlir chuan a hma ai chuan a ni zawk tawh a ni,” a ti bawk.
Hetih lai hian Curry-a’n Golden State Warriors-a a khelhpui, tun inelnaa television analyst-a tang, Draymond Green chuan tih dan thar chu tha a tih loh thu a sawi ve thung.
Rate siam dawn ta se tia an zawhna chu Green chuan, “10 chu tha ber ni ta se, 0 a ni. Engmah lo a ni,” a ti hmiah thung.
“Kumtluanin All-Star-a tel tumin rim takin kan thawk a, a tawpah point 40 hmuh tlin tuma beih leh ringawt chu a ho a ni,” tiin Green hian TNT hnenah a sawi zui bawk.