Aizawl: Women & Child Development Minister Lalrinpuii chuan mahni in lum ngeia hmeichhiate an him ta lo leh an kawppuite kut tuara vanduaina an tawk fo chu hriatthiam har a tih thu a sawi.

Nimin khan Mizo Hmeichhe Insuihkhawm Pawl (MHIP) General Hqrs huaihawtin Salem Venga Rebek Chanchinthangi rawng taka thah a nih chungchangah an tawrhpuizia leh duh lohzia lantir nan Vanapa Hall kawtah an pungkhawm a. He hunah hian Minister Lalrinpuii chuan hmeichhiate chunga hleilenna rapthlak tak tak hriat tur a awm fo chu zahthlak a tih thu leh lungchhiatthlak a tih thu a sawi a. Mahni in lum ngeia hmeichhiate an him ta lo leh an kawppuite kut tuara vanduaina an tawk fo chu hriatthiam har a tih thu a sawi.

Lalrinpuii chuan hmeichhiate zinga hetianga harsatna tawk an awm a nih chuan phone number 181-ah engtiklai pawhin Women & Child Development department-a protection office te biak theih reng an nih thu a sawi.

MHIP President Ngurmawii Sailo pawhin, a pasal kut tuara Rebeki’n nunna hial a chan chu pawi a tih thu a sawi a. He pawikhawihnaa inhnamhnawia sawi, C Lalsiamliana chu a phu tawk hremna hmu ngei se an duh thu a sawi.

Punkhawmnaah hian MHIP branch hrang hrang atangin mi eng emaw zat an tel a. Lungawi lohna lantir nan an au rual bakah, thuziak hrang hrang an keng bawk a ni.

MHIP in a na thei ang bera hrem phut

Mizo Hmeichhe Insuihkhawm Pawl (MHIP) General Headquarters chuan Rebek Chanchinthathangi (42), Salem Veng, a pasal C. Lalsiamliana’n a sawisa hlum chu an dem tak zet a, tualthattu hi dan anga a na thei ang ber a hrem an phut.

Nimina thuchhuah an siamah MHIP chuan Mizo hmeichhiate chungah kutthlakna leh thihna a thleng fo hi vanduaithlak an tih thu leh tun hnuah chuan hetiang ang tualthahna rapthlak tak hi thleng tawh lo se an duh tih tar langin, tun hnuah chuan Mizo hmeichhiate tan thlamuanpui tlaka awm zel turin Mizo mipate an ngen tih an tar lang bawk.