Adviser to Chief Minister TBC Lalvenchhunga, MLA chuan Mizoram sorkarin IAF hnenah Lengpui Airport chu hralh leh hlan a tum loh thu a sawi a. State danga mipuiten IAF airport an tawm zawk ang ni lovin, Lengpui Airport chu an rawn tawm ve zawk dawn tihna a nih ber thu a sawi.
Thawhtannia ZPM pisa-a chhung inkhawmah thu sawiin TBC Lalvenchhunga chuan airport chungchangah a mi mal pawha an beih nasa thu sawiin, “Lengpui Airport hi naktuka hlan mai tur niawm tak hian kan rilruah a awm deuh niin ka hria a. Mi thiam tak takte nen zirchianna hrang hrang kan nei a. Wing Commander Pu J Lalhmingliana hi kan zirchianna kan thawn hmasa ber a, min chhanna chu ‘Airport kan enkawl zawh loh thu leh AAI-in a draft an neih ang hi IAF atangin nei ve phawt rawh u’ tiin thurawn min pe a ni,” tiin, a thurawn anga an kal mek lai chuan a ni lo zawngin media hrang hrangah te an sawi a, wing commander senior dangte leh service lai mekte pawh an rawn nasat thu a sawi.
Mizoram sorkarin Lengpui Airport zir chiang tura a din, Working Committee on Lengpui Airport Chairman TBC Lalvenchhunga chuan, “Vawiina IAF kuta airport hlan duh lotute hian kum 2011-ah ram 32 acre zet mai jet fighter thuhrukna tur a lo pe tawh a ni. Kum 2022-ah AAI-in Mizoram sorkarah draft MoU a rawn thawn leh a, khatihlaia sorkar MNF-ten an tihpuitlin hmain sorkar a inthlak chho zui ta mai zawk a ni. Chuvangin, ZPM sorkar hmalakna a ni bik lo va, party pahnih sorkar tawhte hma lo lak tawhna kan bawhzui mai a ni,” a ti.
Airport hralh an tum lo va, leh hlan an tum hek lo tih sawiin TBC Lalvenchhunga chuan, “IAF kaltlangin changtlung zawka siam theih dan kan dap mek a ni. State danga mipuiten IAF airport an va tawm zawk ang kha ni lovin, Lengpuiah chuan kan airport min rawn tawm ve zawk dawn tihna a ni ber,” tiin, MNF sorkarin kum 2019 leh 2022-ah IAF hnenah Lengpuiah ram 97 acre-a zau leh Sihphirah ram 5 acre-a zau no objection an lo pe fel vek tawh a, tun dinhmunah a hlau ber anga an rawn au leh si chu mak a tih thu a sawi.