Aizawl: Sports & Youth Services Department leh Innovations India Pvt. Ltd. chuan nimin khan Aizawl-ah International Half Marathon buatsaih turin thawhhona thuthlung (MoU) an ziak.
Aizawl International Half Marathon buatsaihna tur tlan kawng hi la tihchian lo ni mah se, a buatsaih nana sum tul chu Innovations India-in sponsorship kal tlangin an dap dawn a, sum tlema zawng chu Sports & Youth Services Department in a tum bawk dawn a ni.
Directorate of Sports & Youth Services, MINECO-a inremna ziahah Sports & Youth Services department aiawhin Secretary, Sports & Youth Services Lalramsanga Sailo leh Innovations India Pvt. Ltd. aiawhin Capt. Rahul Bali ten hming an ziak a ni.
He hun hmanpuitu Sports Minister Lalnghinglova Hmar chuan, Half Marathon intlansiak hi khawvelin a buaipui thu leh a lar chhoh mek thu a sawi a. Infiamna tihhmasawn zel kawngah te, hriselna leh tawksa insawizawi fitness tihlar leh uar zel nan te, khualzin hip belh nan te leh ruihlo dona kawngah te Mizoram tan a tangkai theih thu a sawi.
Lalnghinglova Hmar chuan khawvel leh ram pum huap marathon tlan thin, runner tha an tel theihnan he Half Marathon hi Athletics Federation of India (AFI) hriatpuina leh an calendar-ah telh a nih thei nan hma lak tum a nih thu a sawi bawk.