Higher & Technical Education Minister Dr. Vanlalthlana chuan nimin khan Institute of Advanced Studies in Education (IASE) kum 50 tlin champha lawmna (Golden Jubilee) pualin, IASE hnuaia Digital Content Creation Centre leh Digital Library a hawng.
Hawnna inkhawmah Dr. Vanlalthlana chuan, IASE-in kum 50 hmel a hmu thei chu a lawmpui thu a sawi a. Thawktute leh hruaitute thawhrimna chu chhuanawm a tih thu sawiin, sorkar pawhin IASE chu theitawpa chhawmdawl zel a tum thu a sawi.
Ram leh hnam siam that kawnga a thawhhlawk thei ber zing a mi, zirtirtute chher chuahna hmun a nih angin IASE chu zirna in pawimawh tak a nih thu sawiin Dr Vanlalthlana chuan, IASE-a zirlaite chu zirtirtu an nih hunah pawh zirlaite tana entawn tlak leh ngaihsanawm tak nih tum tur te, an zirlaite thinlungah thil chik peihna (critical thinking) tuh tum thin turin a chah.
Hawnna pual inkhawm hi H. Lalengmawia IAS, Commissioner & Secretary, Department of Higher & Technical Education chuan kaihruaiin thu a sawi bawk.