Aizawl: AH&Veterinary Minister C Lalsawivunga chuan kuthnathawktute thawhchhuah chu ram economy chawisanna a nih avangin an tel lovin sorkar a kal theih loh thu a sawi.
Kum 2023-2024 chhung khan minister hovin Thenzawl Vety Farm-a ran chaw (fodder) chinna hmun acre 57-a zau chu acre 70-a zauhvin a vaiin acre 127 a huam ta a. Selesih Hay House atangin nimin khan minister hian Selesih A.H & Vety Farm-ah Durtlang leh Sihphira bawng vulhtu 41 hnenah a thlawnin bawng chaw tur buhpawl a semchhuak a ni.
Fodder tharchhuah semna inkhawmah C. Lalsawivunga chuan bawnghnute, artui leh sa a intodelh tur chuan ran chaw atanga bul tan a ngai a, a chaw a intodelh hmasak loh chuan a intodelh tak tak theih loh tur thu a sawi.
Minister chuan kuthnathawktuten khawsak dinhmun tha zawka hlan kai chu sorkarin a ngaih pawimawh thu leh state sum indaih lohna karah a theih chin china hmalak pui zel an nih thu a sawi.
Department thawktu leh farmer-te chu ram innghahna leh hnam zahawma insiam theihna tura mawhphurhna kengtu an nih thu a sawi bawk.
Thenzawl bakah AH & Very Department hian Selesih, Thingdawl, Lungpuizawl, Mampui leh Siaha-ah te ran chaw a ching a. Heng hmun a mite erawh hralh chhuah emaw, thawn chhuah emaw tham ni lovin, a hmuna ran vulhte tana hman mai a ni.
Nimina ran chaw a thlawna sem chhuah bak chu man tlawm thei ang bera hralh chhuah tum a ni.