Manchester United-in October thlaa Erik ten Hag an bân khan Premier League-ah 14-na niin point sarih ve vein a sang pali leh a hnuai pathum an phak lo.
Thla thum leh a chanve a liam leh ta a, Tottenham laka 1-0-a an tlawm hnuah 15-naah awmin point 15-in a sang pali an phak lo tawh a, tlahniam thei dinhmuna awm sang ber aiin point 12-in an sang bawk a; manager thar, Ruben Amorim-a hnuaia an chak loh vawi riatna zet a ni tawh.
Portuguese coach hian harsatna tam tak a nei a, a hna a harsa tih pawh a sawi.
Premier League-a United chet chhiat dan hi zep chi rual a ni lo va, Amorim-a hmachhawn mek thil hi a hautak hle.
Amorim-a hian January thlaah tawh khan ‘Manchester United chanchina team chhe ber an ni hial mai thei’ tih a lo sawi tawh.
Club hi first division atanga an tlak hnuhnung ber chu kum 1974 kha a ni.
Premier League chinah erawh tun hi an chhiat ber hun a ni mai thei a. Vawi 25 khelhah point 29 nei tawhin Premier League-a tun ang huna an hmuh tlem ber a ni.
Vawi 12 an tlawm tawh a, an khelh 48% an tlawm tawh tihna a ni.
Inkhelh vawi khatah point 1.16 zel chauh hmu pha ang an ni a, hetiang zela an kal chuan season tawpah 44 an hmu thei dawn a, Premier League-a an point hmuh tlem ber tum a ni thei dawn a ni.
Amorim-a bik hian league-ah vawi 14 khelhpui tawhin vawi li a chakpui a, vawi hnih hnehtawkin vawi riat a tlawm tawh.
Amorim-a’n a enkawl chinah inkhel vawi 14-ah hian Tottenham, Wolves, Ipswich, Leicester leh Southampton chiah United aia point hmu tlem an ni.
Inelna hrang hrangah Amorim hian vawi 21 a kaihruai tawh a. Vawi kua chakin vawi kua a tlawm a, 43% chiah a chakpui.
Kum 2013-a Sir Alex Ferguson-a a chawlh hnuah United manager nghet, vawi 21 an khelhpui thlenga chak zat bi nei hniam ber a ni a, a chungah Louis van Gaal (48%) a awm.
Jose Mourinho (52%), David Moyes (57%), Erik ten Hag (67%) leh Ole Gunnar Solskjaer (71%) te kha vawi 21 an khelh tlin chuan Amorim-a ai chuan an chak tam vek a ni.
United hian league-ah goal 28 chauh an la khung a, khelh apiangin 1.12 zel khung ang an ni a. Ipswich, Southampton, Leicester leh Everton chiah anni aia khung tlem an awm.
Tun season-a inlan tawh lo tur, Amad Diallo chu an top scorer niin goal ruk a thun tawh a. Centre forward Rasmus Hojlund (2) leh Joshua Zirzkee (3) te pahnih hian league-a an inlan vawi 45-ah goal nga chiah an la thun.
Ten Hag-a’n vawi 14 a khelhpui hman chhung khan United Expected-Goals-per-game (xG) chu 1.7 a ni a. Amorim-a chinah erawh xG hi 1.6-ah a tlahniam nghal.