Aizawl: Nikum chhung khan Mizoram pumah malaria vei mi 16,899 hmuhchhuah zingah pasarih an thi.
Thawhlehnia H&FW department hnuaia National Vector Borne Disease Control Programme (NVBDCP) in DHME Auditorium, MINECO-a State review meeting an neih a tar lan a nih danin, nikum chhungin Mizoram pumah malaria vei zat hi mi 16,899 awmin, chung zinga mi 8,950-te chu malaria PF niin malaria natna avangin mi pasarih an thi.
Nikum chhung khan kum dang zawng aiin malaria PV a pung nia tar lan a ni bawk a. Kum 2024 chhung khan dengue vei hmuhchhuah zat hi mi 744 niin, Chikungunya (thosi seh atanga kai tho natna, a thlentu pawh hi dengue thlentu tho Aedes thosi) hmuhchhuah zat hi mi pathum an awm bawk.
Mizoramah hian district pali — Lawngtlai, Lunglei, Mamit leh Siaha district-te hi malaria tam zual bikna te an ni a, a bikin international border – Bangladesh leh Myanmar ramri hrulah te malaria hi a tam zual nia tar lan a ni bawk.
NVBDCP hnuaiah hian malaria natna laka invenna heng – thosilen damdawia chiahsa sem te, thosilen pangngai damdawia chiahsak te leh chenna inchhung thosi hlo a kah te kalpui a ni.