Octave Mizo Choir chuan — Zo Zai/Pawnto hla — music video an buaipui mek.
Zo zia lan tir thei tur leh, tunlai thangtahr zawkte’n hmanlai Mizo nuna pawnto hla an hriat tawh mang lohte rawn hrut chhuakin, zirtirna leh entir tha tak neiin Zo Zai/Pawnto hla an buaipui a ni.
Zo Zai/Pawnto hla hi Mizo Idol judge pawh lo ni tawh, music lama tawnhriat ngah em em, Siamkima chuan mawi tak leh inhnerem tak maiin, pawnto hla pathum chu a remkhawm a ni.
Member 15 awmna Octave Mizo Choir hian, Zo Zai/Pawnto hla music video hi hmun hrang hrangah tum li shooting an nei tawh a. An ruahman lawk dan chuan, kumin Chapchar Kut bawr velah tihchhuah an tum a ni.
Octave Mizo Choir hian, Zo ziarang mai bakah, tourism lam chawi larna atan hian he music video hi an buaipui a. Sum pawh an inseng nual dawn, Rs nuai chuang chu an music video siam nan hian an inruahman a ni.