Ruihhlo leh a kaihhnawih hi a tihrem tak tak a har tawh pawh a ni ang e, vawiin thlengin man tur a la awm reng a, man tak loh thahnem tak a awm ngei bawk ang. Heti tak maia kan thalaite ruihhloin min run mai hi a pawi a, hmalak nasat kan va ngai em.
Heng ruihhlo kaihhnawiha inhnamhnawih zingah hian kumtlinglo an tam hle tih report a la ni lehzel a, a pawi tak zet. Engtia hmalak chi nge ni ang, sorkar hian mutmawh hnarmawha a neih a va ngai nasa tawh tak em.
Heng ruihhlote hi khawchhak lam atanga lo lut a ni tlangpui a, a kalkawng hmasa Champhai lama ruihhlo tawlhna kawngah hian kumtlinglo naupangte inhnamhnawihtir thin an ni a; Champhai district-a naupang kumtlinglo pawikhawih thubuai ziah luh zinga a tam ber pawh ruihhlo tawlha inhnamhnawihtir thubuai a ni bawk!
Champhai district kher lo hmundangah pawh naupang kumtlinglo hi inhnamhnawih an tam hle tih report a la awm lehzel a, a luhaithlak tak zet.
Kan thalaite nun nasa taka suattu ruihhlo hi kan do rem tak tak thei lo a nih pawhin a ven hna hi ngawrh leh chak zawkin thawk ila, a tul anih chuan sorkar pawhin hmalakna lian tham hmasaah nei ngei bawk teh se. Kan khawtlang nun min run a, min beitu ruihhlo tih rem hi kan hna hmasa chu a ni chiang a ni.