Chief Minister Lalduhoma chuan sawhthing lei turin ruahmanna fel tak siam a ni tawh a, sawhthing chingtuten an thar ang angte a bo a bang awm lovin an hralh vek tur thu a sawi.
Vawiin atanga tan tur Assembly Budget Session chungchang leh sorkar hmalaknate sawihovin nimin khan ZPM Legislature Party chu chief minister pisa conference hall-ah an thukhawm a. He hun kaihruaitu, chief minister chuan kuthnathawktuten sawhthing an hralhna tur ruahmanna fel tak siam a nih thu sawiin a chingtuten an thar ang angte an hralh vek tur thu a sawi.
Chief minister chuan sawhthingte hi secondary collection centre 62 atanga hralh tur a nih thu sawiin a ruala chawh vek a rem loh chang a awm a nih pawhin, mipuiten ruahmantute thu lo ngaichang thiam tura a duh thu a sawi bawk.
Hmunphiah hralh mek a nih thu sawiin chief minister chuan, empanelled buyer-ten hmunphiah Grade ‘A’ duhkhawp lei tur an hmuh loh chhan en zui mek a ni a, hmunphiah hralh thei lo an awm a nih chuan sorkarin March thla chhungin a leisak vek tur thu a sawi bawk.