ICC Men’s Champions Trophy chu 2017 hnua a vawi khatna atan khelh leh a ni ta a, cricket hmanga team riat inelna turah hian champion team chuan trophy bakah Rs. vaibelchhe 20.8 an dawng dawn a ni.
Pahnihna team dawn tur pawh a tlem hran lo hle a, Rs. vaibelchhe 10.4 zet chu a ni dawn a, semi final-a chak lo team hnihte chuan Rs. vaibelchhe 5.2 ve ve an dawng ang.
Kum 2017 ai khan lawmman dawn tur pawisa fai hi a pung nasa hle a, a punna hi 53% vel zet a ni tawh dawn a ni.
Group match an khelh apiangin a chak zawkte chuan Rs. nuai 29 an dawng zel ang a, a tawpa pangana leh parukna team chuan Rs. vaibelchhe thum an dawng ang a, pasarihna leh pariatna team chuan Rs. vaibelchhe 1.2 ve ve an dawng dawn bawk a ni.
He inelnaa tel tur team riatte hian ICC Men’s Champions Trophy 2025-a an tel vang hrim hrimin $125,000 chu an dawng nghal dawn a ni.
Kum 1996 hnua a vawi khatna atan cricket hmanga khawvel huap inelna chu Pakistan-ah an nghat a. Karachi, Lahore leh Rawalpindi-ah te an inkhel ang a, March 9 ah khian final khelh tura ruahmanna siam a ni.
Team riatte chu team li awmna group hnihah an inthen a, group pahniha team sang pahnihten semi final an lut dawn a ni.
ICC Men’s Champions Trophy hi kum li dana neih zel tur a ni a, ODI team tha zual pariatte chu he inelnaah hian an tel thin a. Kum 2027 atangin Women’s Champions Trophy an buatsaih tan dawn bawk.