Toronto Pearson Airport, Canada-a thlawhna tum suala leta chuang passenger leh thawktu zawng zawng chu an him vek tih airport chief executive-in a sawi.
“Thi an awm lo leh hliam tlem chauh an awm hi kan lawm hle a ni,” tiin Greater Toronto Airports Authority hotu, Deborah Flint chuan a sawi.
Naupang pakhat leh puitling pahnih erawh an na deuh hlek niin emergency services chuan an sawi a. Social media-a thlalak darhah chuan thlawhna hi vurin a bawh tak karah a thal zawngin a awm a, a thla pakhat zawk a tla niin a lang bawk.
Toronto Pearson Airport chuan thlawhna chesual hi Delta Air Lines niin Minneapolis atanga tum a ni a, mi 80 chuangin passenger 76 leh thawktu pali an ni tih a sawi.
Passenger 18 chuan hliam tenau an tawrh avangin damdawi in panpui an ni.
Ontario air ambulance service Ornge chuan air ambulance helicopter pathum leh lirthei ambulance pahnih an tirh thu an sawi.
Hliam na deuh hi naupang pakhat leh mipa kum 60 bawr leh hmeichhia kum 40 bawr vel a ni.
Flint-i chuan rikruma che chhuak miten ‘zirlaibua inziak ang maia thawkin’ nunna chân tur tam tak an chhan chu lawmawm a tih thu a sawi.
US Federal Aviation Authority chuan thlawhna hi Delta Air Lines Flight 4819 niin Endeavor Air-in an enkawl niin a sawi.
Delta pawhin CRJ900 thlawhna hi Thawhtanni chawhnu dar 02:15 (India-a Thawhlehni zing dar 12:45)-ah a chetsual thu an puang a. Passenger 24 chu Canadian niin mi dang erawh ram hrang hrang mi an ni.
Chhiatna a thlen hnu rei vak lovah tumhmun pawh khar a ni a; mahse, tlai dar 05:00 vel atang chuan dan pangngaia engkim kalpui lehnghal a nih thu tumhmun chuan a sawi.
Transportation Safety Board of Canada chuan chanchin kimchang leh thil thlen dan en zui tur team an dah nghal tih an sawi a. Tlankawng pahnih pawh chhui chhung khar a ni dawn a, hei vang hian thlawhna tihkhawtlai pawh a ni dawn tih an sawi.
Toronto Pearson fire chief Todd Aitken chuan Thawhtanni zan khan an la chhui tan chauh va, thil sawi thuitur a la awm lo niin a sawi a. Tlankawng a ro tha a, thli na tleh a awm lo bawk tih a sawi.
Toronto Pearson Airport-ah hian tun hnaiah khaw awm dan dik lo, vur tla nasa hle khaw vawt lutuk avangin thlawhna lut leh chhuak tihkhawtlai a ni fo.
Tun tuma thlawhna chesual hi thla khat chhunga North America-a chetsualna thleng palina a ni tawh a. Heng zingah hian Washington DC-a Ronald Reagan airport bul lawka sipai helicopter leh passenger phur thlawhna insua mi 67 thihna pawh a tel.