Czech skier Tereza Nova-i chu a training-naa chesualin a thluak zaisak a nih hnuah leh chawlhkar li zet nikhawhrelova a awm hnuah a harh chhuak leh ta.
Kum 27 m hi 2022 Winter Olympics-ah pawh khan a inlan a. January 24 khan kha mi chawlhkara hmeichhe World Cup downhill neih tura German resort, Garmisch-Partenkirchen-a a training chu a chesual a ni.
Tunah chuan a dinhmun a tha tawh a, an inah hawpui a ni tawh tih Czech ski federation chuan a puang.
“Kawng thui tak zawh tur erawh a la awm a; mahse, kan zawh chhuak ngei ang tih ka ring tlat a ni,” tiin Nova-i kawppui, national ski coach Ondrej Berndt chuan a sawi.
“Kan pahnih bakah Tereza-i nu leh pate nen, thlawpna kan dawn zawng zawngah lawm thu kan sawi a, chutih rual chuan Tereza-i’n dam lam pan tuma a beih meknaah hian a mi mal zahawmna min vawnsak tlat turin ka ngen bawk a ni,” a ti.
A chetsual hnuah Nova-i hi ski slope atangin thlawhna hmangin damdawi in panpui nghal a ni a, a lu a sawhna lamah a thluak a khawih avangin enkawl nghal a ni a, thi a put a, a thluaka thisen zam a chat a, a mit ruh a sawh chhe bawk.
Doctor-ten chawlhkar hnih an enkawl hnuah Nova-i hi a harh tan a, damdawia an enkawlna pawh tihhniam hret hret a ni tawh bawk.
2022 Beijing Olympic-ah khan downhill-ah khan 28-na a ni phak a, tun season-ah pawh a chetsual hma khan World Cup vawi thumah a inlan tawh.