Delhi sorkar ding thar tur chu hmeichhia bawkin a hruai leh dawn a, BJP chuan chief minister atan a vawi khat nana MLA atana thlan, Shalimar Bagh bialtu, Rekha Gupta an ruat ta.
BJP legislature party chu Nilaini thim hlimkhan thukhawmin Gupta-i hi an hruaitu atan an thlang a. Aam Aadmi Party (AAP) hruaitu, Atishi-i a thlak dawn ta a ni.
Arvind Kejriwal-a kaihhruai AAP hian kum 10 ro an rel hnuah BJP an sorkar ve tan dawn ta a, Ningani tlai hian lak luh a ni ang.
Chief minister thar tur hi Delhi BJP-in X-ah an puang a. “Delhi BJP Legislative Party hruaitu atana thlan, Pi Rekha Gupta-i kan lawmpuiin duhsakna kan hla a. A kaihhruaina hnuaiah state-in nasa takin hma a sawn ngei ang,” tiin Hindi-in an tar lang.
Gupta-i hian council member paruk a nei dawn nia sawi a ni a, hetah hian BJP thlawptu hnam hrang hrang – Jata, Baniya, Punjabi leh Dalit atangin an tel vek dawn a. Heng mi parukte hi Manjinder Sirsa, Ashish Sood, Pankaj Kumar Singh, Ravinder Singh Indraj, Kapil Mishra leh Pravesh Verma an ni dawn nia sawi a ni bawk.
“BJP chungah ka lawm a, mal min sawmnaah ka lawm tak zet a ni… Delhi-in hmel thar a neih theih nan ka thawk ang,” tiin Gupta-i hian Raj Bhavan pana sorkar a siam theih thu a thlen hma lawka thuthar lakhawmtuten an kawmnaah a sawi.
Tar lan tawh angin Ningani tlaia BJP sorkar lak luhna hi lian taka tih tumin party a inbuatsaih a, Delhi-a an chhinchhiahna pakhat, Ramlila Maidan-ah inkhawm huaihawt a ni ang.
BJP-in Delhi-a chief minister an neih hnuhnung ber chu hmeichhia tho, Sushma Swaraj-i a ni a, kum 1998 khan ni 52 chhung chanvo sang ber hi a chelh.
Congress hruaitu, Sheila Dikshit-i’n thlak zuiin ani hian Congress chu ram khawpui berah hian term thum chhung a kaihruai tluan a ni.
Gupta-i hi New Delhi biala AAP chief Kejriwal-a hnehtu, Parvesh Verma aia thlan chhuah a ni a. Verma hi Delhi chief minister hlui, Saheb Singh Verma-a fapa a ni nghe nghe.
Chief minister atan hian sawi rik rin ber a ni a, hemi chungchangah hian eptute chuan BJP-in an duh lo em em, inthlan chhawn politics an kalpui ve dawn tiin an lo sawi hman a ni.
BJP hian state dangah pawh chief minister atan hian a vawi khat nana MLA atana thlan thar an lo ruat tawh thin a, heng zingah hian Gupta-i pawh a tel ve ta a ni.
A lawmpui hmasatu zingah chief minister kal chhuak tur, Atishi-i pawh telin puih a tul phawt chuan a hreh loh thu a sawi bawk.
“BJP Legislative Party hruaitu atana an thlan, Pi Rekha Gupta ka lawmpuiin duhsakna ka hlan a. Prime Minister Pu Narendra Modi-a tum ang ngeiin rim taka thawka kawvel khawpui ropui zinga Delhi dah turin i thawh theih ngei ka ring a. I kaihhruaina hnuaiah BJP sorkar hian BJP malsawmtu Delhi-a kan nute leh laizawnte beisei leh hmathlir tihlawhtling tura chhun zan zawma in thawh ngei ka beisei,” tiin Union Home Minister Amit Shah chuan X-ah a tar lang bawk.
Gupta-i hian a politics zinkawng hi Akhil Bharatiya Vidyarthi Parishad atanga tanin a hnuah Delhi University Students’ Union (DUSU) president leh general secretary a ni zui.
Delhi-ah hian BJP Mahila Morcha general secretary a ni a, an party national executive committee-ah member niin kum 2007 khan North Pitampura bialah councillor atan thlan a ni a. South Delhi Municipal Corporation-ah mayor a lo ni tawh bawk.