Aizawl: Nimin khan State Day of Prayer Committee (SDPC) bultumin Mizoram district hrang hrangah a huhoa ram tana tawngtaina hun, State Day of Prayer hman a ni. Kumina thupui atan ‘I ram Lo Thleng Rawh Se’ tih a ni.
State Day of Prayer hmanna pui ber Aizawl sipai Lammual-ah chuan Chief Minister Lalduhoma hoin chawhma dar 11 atangin hun hman tan a ni a. SDPC Chairman Rev. Dr K Thanzauva’n kaihruaiin, MKHC aiawhin thu tawi a sawi bakah, mipui tan a tawngtai a. Chief Minister Lalduhoma’n State Day of Prayer a hawng.
Chawhnu hun chu SDPC Working Chairman Upa F Rodingliana’n kaihruaiin, Bethel Ministry Speaker Fredrick Lalrindika leh Mizorama MLA nei party pali aiawhten thu an sawi bakah, mi 1,000 chuang telna zaipawlin ‘Halleluiah Chorus’ an rem a ni.
He hunah hian chief minister Lalduhoma bakah Minister, MLA leh sorkar official leh mipui thahnem tak an tel.
Rampum huap tawngtai rualna neih hi Lawngtlai-ah chuan District Level Steering Committee leh Lawngtlai Prayer Fellowship te tangdunin an huaihawt a. Central YLA Playground-ah neih a ni.
Hriat theih chinah Champhai-ah chuan State Day of Prayer Committee (SDPC) Champhai District bultumin CDFA Playground-Chhangphut Field-ah hman a ni a. Serchhip-ah District State Day of Prayer Committee buatsaiha tawngtai rualna hun hi Serchhip Auditorium-ah huaihawt a ni a. Kolasib-ah Kolasib Bawrhsap pisa tualah tawngtai hona neih a ni a, he hun hi PCI, Kolasib Hmarveng bialtu Pastor Laldintluanga’n a kaihruai a. Saitual-ah chuan Public Playground-ah, Pastor Thangchhuaka, BCI, Saitual bial kaihhruainain State Day puala ram pum huap tawngtaihona ‘State Day of Prayer 2025’ hman a ni.