Aizawl: ‘Ek Bharat Shreshtha Bharat’ hmalakna hnuaiah Mizoram Gen. Larsap Vijay Kumar Singh hovin Mizoram leh Arunachal Pradesh-te state puitlinga hlan kai an nihna, ‘Foundation Day’ lawmna Durbar Hall, Raj Bhavan-ah buatsaih a ni.
He hunah thu sawiin Larsap VK Singh chuan Mizoram leh Arunachal Pradesh state-te dinchampha ‘foundation day’ pual chibai bukin duhsakna a hlan a. State pahnihte chu state nuam leh mawi tak, tribal hnam hrang hrang leh tihdan phung hrang hrang neite inrem taka khawsakhona a nih thu sawiin, hnam bil sawi lova state anga hmasawn tlanna tur ngaihpawimawh a tul thu a sawi a. Hnam ziarang leh tihdan phungte chu phuarkhawmtu, kaihruaitu leh nihna tichiangtu a nih tlat avangin ngaihlu a, vawnghim zel turin a chah.
Larsap chuan Ek Bharat Shreshtha Bharat programme chuan India rama hnam hrang hrang, tawng, ei leh bar, incheina leh nunphung thlenga danglamte inkara inpumkhatna siam a tum tih sawiin, “Kan hriatfiah ngai chu kan danglamna hi min thendarhtu tur ni lovin min phuarkhawmtu tur zawk a ni a, hei hian inhriatthiamtawnna min pek bakah ram anga hmasawnna kawng kan zawhnaah pawh hmalam min panpui zawk a ni,” a ti.
India chu khawvel ram dangte awhrawn leh beiseina kawnga entawn berte zinga mi a nih thu sawiin larsap chuan, “Hei hi kan zavaia thawhhona avang a ni a, India ram hmasawnna hi kan kutah a innghat tlat a ni,” a ti bawk.
Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT hrang hrangte dinchampha Foundation Day lawmna chu Raj Bhavan, Mizoramah Larsap kaihhruaiin June, 2023 atang khan buatsaih tan a ni.