India ramah hian lirthei chetsualna hi a thleng tam hle a, nunna chan tam tak awm phahin, heng chetsualna thleng tam zawk hi a khawl lam fel loh aimahin, a mihring thiam loh hi a tam zawk mah.
Mizoram chhung ngeiah pawh lirtheia chetsualna hi a thleng tam hle a, kum nga chhung (2019-2023) ringawt pawh khan lirthei chetsualna hi tum 423 thlengin, hemi vang hian mihring nunna 355 chan an awm hial.
Heng chetsualna thleng leh nunna chante awm chhan hi a tam zawk chu a mihringte thiam loh vang a ni a, keimahni chochhuah hi a tam zawk chu a ni chiang hle a lo ni.
Traffic kaihhnawih inzirtirna thuthar thehdarhtute puala hmannaah lirthei khalhtute tana pawimawh leh hriat tur hrang hrangte Traffic Sr. SP chuan tarlangin, mipuite chu lirthei khalh dawna dan leh dun hriat kawngah kan thanharh zual deuh a ngaih thu a sawi a, dan zawm chu mipuite himna a nih hriat reng a tul thu a sawi bawk.
Report hrang hrang atanga a lan danin traffic police lamte hi an indaih lo hle mai a, unit dang atanga an pawh pen an awm loh theih loh thin avangin a ngheta lak dan tur liau liaute hi sorkar hian ngaihtuahpui thei se la, tun aia hneh leh lirthei vei vak enkawl kawngah hian hma kan sawn ngeiin a rinawm a ni.
Tin, mipui lamte pawhin lirthei kan khalhchhuak tawh a nih chuan dan leh dun hrang hrangte hi kan hriat reng a tul a, zebra crossing bula din dan tur thlenga kan hriat bel hle hi a tul thar hle.