Aizawl: Mizo Cultural Organisation (MCO) Gen. Headquarters-in nimin khan Zarkawt YMA Recreation Centre, Aizawl-ah Cultural Day an hmang a. Mizo hnam lâm leh zai hmangin hun an hmangho.
MCO Cultural Day hi an pawl Vice President John Saikhuma’n kaihhruaiin, MCO performing troupe-ten Hlado chhama silai kapin bul an tan a. MCO Executive Committee Member B Lalrintluangi’n an hun hman turte Pathian hnena a hlan hnuah, MCO General Secretary Lalbiakhlua’n report pein, hun hlimawm tak an hmang zui a ni.
MCO Cultural Day-ah hian MCO Gen. Hqrs President Robert Romawia Royte pawhin thu a sawi a. MCO branch leh club hrang hrang ten Mizo hnam lam chi hrang hrang entirin, Mizo hnam zai lama zaithiam hriathlawh tak tak ten zaiin kalkhawmte an awi bawk.
MCO Cultural Day hmanga kalkhawmte hian chaw funin, chhunah a huhova chhunrawl fakin, nilengin hun hlimawm tak an hmang ho a ni.