Union Minister of State for Micro, Small and Medium Enterprises (MSME) Shobha Karandlaje chuan sorkar laipuiin Mizoram tan sum tam tak a pe chhuak a, heng sum a pek chhuahte hi a hman that tawk loh avangin mipuiin harsatna an tawk tih a sawi.
Nimin khan BJP pisa, Mipui Rûn-ah chanchinbumite kawmin Karandlaje chuan sorkar laipuiin Mizoram tan hmasawnna ruhrel hrang hrang zirna kawngah te, hriselna kawngah te, agriculture leh horticulture, MSME leh hmasawnna ruhrel (infrastructure) dinna atan sum tam tak a pe chhuak tih sawiin, “Sorkar laipuiin Mizoram tana sum a pek chhuahte hi state sorkarin a hman that tawk loh avangin Mizo mipuiin kawng hrang hrangin harsatna an tawk a ni,” a ti.
Union minister chuan PM scheme hrang hrangahte hian sorkar laipui chuan a hun takah sum a pek vek thin thu sawiin, “Mizoram sorkar chuan PM scheme hi tha taka mipuiin an chhawr theih nan a hun takah a pek chhuah ve zel a ngai a. Chutiang a nih loh chuan scheme kaltlanga mi retheiten hamthatna an dawn tur ang hi an dawng thei thin lo va; chuvangin, Mizoram mipuite hian anih tur angin an chhawr thei dawn lo a ni,” a ti.
Sorkar laipuiin Mizoram tan fund leh scheme hrang hrangte hi mipuite hnenah a puan zar that tawk loh avangin mi rethei zawkten an hamthatna an dawn tur ang an dawng thin loh thu sawiin, state sorkar thuneitute chu mi retheite tan an hamthatna an dawn tur ang an dawn theih nan hma la tur leh fuiha an awmna hmuna kalchilh turin a ngen bawk.
Mizoram din chhuahna tur atan organic thlai thar chhuah kawngah hmalak a pawimawh tih sawiin union minister chuan, “Ngun taka zir chiang a, organic farming hmanga intodelhna kawng kan zawh theih chuan, India ramah ngei pawh mamawhna a san avangin Mizoram hi kan intodelh thei a ni,” a ti a. Sorkar laipui chuan hmasawnna nghet tak a neih theihna turin entrepreneurship a chawisang mek tih a sawi bawk.
Union minister chuan E-Shrm chungchangah state sorkarin mipui zirtirna tha a pek a ngai tih a sawi a. E-Shrm hi Mizoram mipui hian an chhawr tangkai a, sorkar hnathawk lo, mahni a ei zawng, kuthnathawktute chu inziak lut vek turin a sawm.
Union minister chuan Lengpui Airport chu ‘Krishi UDAN Scheme’ hnuaia tihchangtluna thlawhtheihna hmanga agriculture thar chhuah phurh luh leh chhuah a nih theih nan hmalak mek a nih thu a sawi bawk.