Tottenham Hotspur chuan TV vela an club hming ‘Tottenham’ tia an ko thin chu an duh tawh loh thu puangin, an hming pum ‘Tottenham Hotspur’ tih a nih loh chuan ‘Spurs’ tia koh zel an duh tawh thu an puang.
London khaw club hming hi TV velah Tottenham tia sawi mai a ni thin a, hetiang hian kum tam fe chu an lo ko tawh thin a. Tun hnaiah Tottenham Hotspur chuan an hming pum khera koh hi an phut thar a, 2011 atang tawh khan hetiang ngaihdan hi chu an lo nei tawh a ni.
An club hming pum ngeia koh an duh thu hi sawi lang tawh mah se zawm a hlawh lo hle a, hei vang hian tun hnaiah an tharthawh leh ta a ni a. Khawvel huapa Tottenham Hotspur tia hriat lar thar an duh niin an sawi a, Manchester United, Manchester City leh Aston Villa te nen huang khata awm tura an inngaih thu an sawi.
Manchester United tantute chuan an club chu United tiin an sawi thin a, Manchester City tantute pawhin City an ti awlsam mai a, Aston Villa tantute pawhin Villa tiin an sawi ve bawk a. Tottenham Hotspur tantute pawhin an hming pum a nih loh pawhin Spurs tia sawi thin hi an duh a ni.