Rs nuai 500 senga dawh, Mizoram leh Manipur inrinaa Tuivai lei (bailey bridge) chu Inrinni khan Chief Minister Lalduhoma’n a hawng.
Inunauna Lei (Unity Bridge) tia vuah Tuivai lei hi meter 200 (TDR)-a sei a ni a, a lawn kaina lei meter 50 (DS) nei, a vaia meter 250 a sei a ni a. Metric ton 30 dawl zo tura dawh ni mah se, tlo leh him taka a awm theih nan 20 MT chin chauh zawhtir phal a ni.
Hawnna inkhawmah chief minister chuan Tuivai lei chu kum 1990 khan tui lianin a la a, kum 1992 khan a lei innghahna siam tha chuang lovin dawh that leh ni mah se, kum 1997-ah tui lianin a la leh a. Mizoram PWD-in lei dawh tha leh turin kum 1999 khan hma la leh mah se, Manipur-a Zo hnahthlak unauten harsatna an tawk a, an mamawh engkim Mizoram lam atanga lak luh vek a tul a. Lei siam that hi a tul tak hle avangin MoRTH lamin permanent-a dawh tumin hma an la mek tih hre chungin sum leh pai seng lutuk lova bailey bridge part hluite fawm khawmin dawh an rilruk a. Hna an thawh tan lai, nikum May 9 khan amah ngeiin tlawhin hmanraw thar hmanga dawh zawk turin PWD engineer-te a hrilh tih a sawi.
Lei a tlawh tuk, May 10, 2024 khan sum mamawh, Rs nuai 500 an sanction tih sawiin Lalduhoma chuan, “Hna hmanhmawhthlak bik leh pawimawh bika kan ngaih avangin chak takin an bawhzui a, kum khat pawh a ral hmain an dawh zo va. Tun thla ni 2 khan uluk takin an enchhin a, tha tawkah an ngai a. Vawiinah a lei hmasa a chhiat atanga kum 28-naah, kalphung thar, mipui sorkar chuan kan lo dawh kai leh ta a ni,” a ti.
Lalduhoma chuan kawngpui tha pahnih an lo nei dawn ta hi thaw a veng huai tih sawiin, “He lei chhawr phak mipuite ka lawmpui a, Manipur-a kan unau harsatna tuar mekte puala theihtawp chhuaha kan dawh a nih avangin Inunauna Lei (Unity Bridge) tiin a hming ka vuah a ni,” a ti bawk.
Tuivai lei bula hawnna inkhawmah hian Assembly Speaker Lalbiakzama, PWD Minister Vanlalhlana, Leader of Opposition leh Tuivawl bialtu MLA ni bawk, Lalchhandama Ralte leh Adviser to CM Lalmuanpuia Punte ten thu an sawi.
He hunah hian Dy Speaker Lalfamkima, Forest Minister Lalthansanga, Supply Minister B. Lalchhanzova, RM Chakma, MLA leh Mizoram sorkar official, Pherzawl district leh Mizoram lam mipui thahnem tak an tel bawk.