French khawchhak lama Mulhouse-a chemtea mi beihna thlengah mi pakhat a thi a, police officer pathumin hliam an tuar bawk.
A hmunah hian kum 37 mi Algerian mipa man nghal niin prosecutor-te chuan pawi a khawih paha ‘Allahu Akbar’ tia a au avangin firfiaka chetna angin an chhui nghal.
Police officer pahnih chu an na hle a, pakhat hi a nghawnga hliam niin pakhat hi a awmah a ni thung a. Portuguese putar kum 69 mi chu vih hlum a ni.
A titu nia puh hi firfiakna lam hawia rinhlelh a nih sa avangin thawn haw tura tih mek a ni tih tual chhung prosecutor chuan a sawi a. President Emmanuel Macron chuan ‘rinhlelh rual lovin Islamist firfiak chetna a ni’ tiin a sawi.
A tuartu chhungkuate a tawrhpui thu Macron-a chuan a sawi a, “Sorkar leh keima mi mal pawhin he rama firfiaka chetna tihtawp tumin kan thawk zel ang,” a ti.
Pawikhawihna hi Inrinnia khawpui bazar lun lai tak bul lawka tlai dar 04:00 (India-a zan dar 08:30) hnu lama thleng niin Germany leh Switzerland nena an inrina bul lawk a ni.
Police officer-te hi Democratic Republic of Congo thlawpna lantirna hmuna duty-a awm mek an ni.
Officer pahnih hi damdawi inah hruai an ni a, a awma hliam tuar zawk chu chhuah leh nghal a ni a, mi dang pathumin hliam tenau an tuar bawk niin AFP news agency chuan a tar lang.
Inrinni zan khan Interior Minister Bruno Retailleau chuan a hmun hi a tlawh nghal a, TF1 hnenah a titua an puh hi France-in vawi 10 thawn kir a tum tawh a, Algeria-in an lo pawm duh lo zel tih a sawi.