Khualzinna ah te, ei leh in lam thilah te, shopping velah te sum ren lo taka hmang huau huau kan hmu fo.
Amaherawhchu, nikhatah emaw vawikhatah shopping nana Rs Nuai 70 chuang hmang ziah hi an awm lovang.
Daily Star tarlan danin , Soudi tia hriat hmeichhe pakhat chu a pasal sum lo hman hiau hiau kha a tan chuan ‘hobby’ a ni ringawt mai a, Dubai-a cheng hian nitin tih mai turin shopping nan India pawisa cheng nuai 70 vel a hmang.
“Ka pasal (Jamal)-a mood fuh dan azirin vawikhat shopping-ah hian pound 3,600 atangin 72,000 kan hmang ziah thin” tiin Soudi hian a sawi.
Designer thawmhnaw tha bik leh tobik lo chu a melh ngai reng reng lova, vawikhat zinchhuah ah a lo berah Rs Nuai 14-15 chu hman ngei ngei turah a ngai hmiah. Tunhnai khan Maldives-ah a zin a, sum sen belhkhawm hi Rs Nuai 12.78 a ni. “Maldives zin hi kan nupa in nuam kan ti a, thlahnih khat danah London kan kal ziah bawk a, lehpekah chuan Japan kal kan tum,” a ti bawk.
Soudi hi Sussex, UK-a piang a ni a, a pasal Jamal hi Saudi Arabia-a mi hausa tawntaw a ni.
Kum 6 mi lek a nihin Dubai-ah an chhungkuain an pem lut a, Dubai-a university pakhatah an pahnih hian an intawng.
Hmun li ngawtah pui tham takin inneih an buatsaih a, tunah hian inneih kum hnihna hmang mekin, sum leh pai hmanralna kawngah insum ngaihna pawh an hre lova, an duhzawng, mit la zawng leh itzawng chu an lei hmiah miah mai.