Aizawl: P&E Minister F Rodingliana chuan sorkar pisa zawng zawngah ni zung chakna hmanga kawlphetha siamna, solar rooftop siam nan sorkar laipui atangin Mizoram sorkarin Rs vbc 44 a hmu dawn tih a sawi.
Zirtawpnia sorkar laipui scheme, PM Surya Ghar: Muft Bikli Yojana hnuaia solar rooftop bunte hnena tanpuina duan sem chhuahna, P&E Engineer-in-chief Office Conference hall, Kawlphetha building, MINECO-a neih a hmanpuinaah F Rodingliana chuan sorkar laipuiin sorkar pisa zawng zawngah solar rooftop bun tura a tih chu, Mizoram sorkarin sum a neih loh avangin Union Minister hnena an dilna chu a tirah remtihsak ni lo mah se, chief minister nena an sawi dun hnuah sorkar laipui hnen atangin Rs vbc 44 an hmu dawn tih a sawi.
P&E minister chuan sum hi an dawn hunah sorkar pisa zawng zawngah rooftop solar bun a nih chuan, kawlphetha megawatt 3 deuhthaw building chung atangin a thlawnin an dawng thei dawn tih a sawi.
Mizoram chu state anga subsidy pe hmasa ber an nih thu sawiin P&E minister chuan, state thenkhatah sorkar laipui chiahin subsidy a pe tih a sawi a. An ruahman dan chuan state sorkar hian zaa 25 hi an intum dawn tih a sawiin, hei erawh mipuiin an la hriat tam loh avangin solar bun lam hna buaipuitu leh thawktute chu mipui bengvar kawngah tan la thar turin a chah.
F Rodingliana chuan kum 2022-2023 inkarah sorkarin kawlphetha hman man a pek tlai avangin surcharge-ah Rs vbc 5.13 a chawi a, nikumah erawh a hun taka pek a nih avangin rebate Rs nuai 108 chuang a dawng thung tih a sawi a. Kawlphetha thim chungchangah pawh, sorkar thar hnuaiah nikum khan thim zing angin lang mah se, kum 2023 ai khan darkar 700 chuangin a thim zing lo zawk tih a sawi.
He hunah hian P&E minister hian mi paruk hnenah rooftop solar siamna tur subsidy cheque a hlan a ni.