Aizawl: April, 2024 leh January, 2025 inkarah Mizoramah HIV kai thar mi 169 hmuhchhuah a ni.
Thawhtanni khan state dan siamtu (legislator)-ten HIV/AIDS lama hma an lakna tur committee sang, Mizoram Legislative Forum on AIDS chu I&PR Conference Hall-ah Health Minister Lalrinpuii kaihhruaiin an thukhawm.
Thutkhawmah hian MSACS Project Director Dr. Jane R. Ralte tar lan danin, Mizoramah January, 2025 thleng HIV kai mi 32,287 hmuhchhuah an ni tawh a. He natna avanga thi hi hriat theih chinah mi 5,511 an tling tawh a. April, 2024 leh January, 2025 inkarah HIV kai hmuhchhuah mi 1,769 an tling.
Nikum April leh kumin January inkara HIV kai thar hmuhchhuah zat atanga za zela 67 chu invenna tel lova sex hman atangin a ni a, hriau thlianghlimlo inhmantawm atanga kai hi za za zela 30.44 an ni.
MSACS Project Director chuan Mizoram chu HIV natna avanga hun engemaw chen a thalo zawngin langsar mah se, tun hnaiah hmasawnna hmuh tur duhawm tak tak a awm ve zela, natna hrik kai thar an tlak hniam bakah he natna avanga thi nasa taka an tlem tawh thu a sawi bawk.
Thutkhawm kaihruaitu Health Minister Lalrinpuii chuan, HIV chungchanga Mizoram dinhmun chu mipui nawlpuiin an vei a tul tawh thu leh, legislator-te pawhin tun aia nasaa hma an lak a pawimawh tawh tih a sawi. India rama HIV hluar dan (prevalence rate) zaa 0.2 anih lain, Mizoramah chuan sang ber niin a hluar dan chu zaa 2.73 a nih thu a sawi.
He hunah hian mahni inringhlelte tan thisen test thuai a pawimawh thu leh hrisel tha pangngai taka awm nan ART damdawi ei uluk a tul thu sawi a ni a. HIV darh zel tur venna kawnga pawimawh tak Drop-in-Centre mumal taka hman tangkai leh theih dan turte rawtna siamin sawiho a ni.
MLA-te pawhin HIV darh zel tur dona kawnga tha thawh an inhuam thu an sawi angin, kum 2024-2025 chhungin MLA fund atangin Rs 50,000 theuh HIV hrik kai ten chatlak lova ART damdawi an lak theih nan, ART panna tur senso atan MSACS hnena hlan an remti bawk.