Chief Minister Lalduhoma chuan state danga thleng zen zen lo, Mizorama khuarel chhiatna avanga harsatna thleng thinte chu finance commission chuan a ngaih pawimawhsak a tul thu a sawi.
Thawhtannia Secretariat Conference Hall, MINECO-ah Mizoram sorkar hotute leh 16th Finance Commission hotute an inkawm a. He hunah chief minister chuan Dr. Arvind Panagariya, Chairman leh 16th Finance Commission member lo kalten Mizoram tan hmachhawp duhawm leh hmakhaw êng tak a siam phah ngei a beisei thu a sawi.
Chief minister chuan Mizoram chu ram leilung zau zawng za zela 84 aia zau chu ram ngawin a tuam thu sawiin leilung hausakna, thing leh mau leh nungchate chenna hmun pawimawh tak a nih bakah boruak thianghlim petu leh sik leh sa inthlak thleng nasa lutuk tur vengtu pawimawh tak a nih thu a sawi.
Mizoram chu tribal hlang deuhthaw chenna, kut hnathawka innghat tamna state a ni chungin India ramah ziak leh chhiar thiam tamna state a nih bawk thu sawiin Lalduhoma chuan, “Amaherawhchu, ram leilung pianhmangin a zir loh avang a inkalpawhna kawng a harsatna te, hmanraw man sang avang te leh industry lian behchhan tur a awm loh avangtein hmasawnna ruangam duang tur chuan sorkar laipui puihna a tul fo a ni,” a ti.
Chief minister chuan Mizoram sorkar sum lu za zela 83.56 bawr vel chu tax devolution leh grants-in-aid a nih thu sawiin za zela 16.77 vel chauh state chhung atanga hmuh a nih thu a sawi a. State danga thleng zen zen lo, khuarel chhiatna leimin, ram kang, tui lian leh ruahtui tam vang a harsatna thleng thin te chu finance commission chuan a ngaih pawimawhsak a tul thu a sawi.
An inkawmnaah hian state sorkar department 29 atanga hmachhawp hrang hrang ruahman a nih dan te, mipui hriselna enkawl kawng a ruahmanna te, zirna tihmasawn tura hmachhawp te, inkalpawhna kawng tihchangtlun a pawimawh thu te leh sorkar sum renchem kawng a hmalakna kalpui dante sawi fiah a ni.
16th Finance Commission hotute chuan Mizoram sorkarin thalaite thiamna leh theihna (skill development) tihpun a nih theih nana rawtna te, mau hman tangkai lehzual dan ngaihtuah tur a rawtnate, nursing school leh college changtlung kalpui zel tur a rawtna hrang hrangte chu an zirchian tur thu an sawi.
He hunah hian chief minister bakah minister-te, chief secretary, Mizoram sorkar hnuaia department hrang hrang secretary leh director-te an tel a ni.
Political party, tlawmngai pawl leh local body hotute nen inkawm
Mizoram tlawha rawn zin mek 16th Finance Commission hotute leh Mizorama political party, tlawmngai pawl leh local body hrang hrang hotute chu nimin khan Aijal Club-ah an inkawm.
An inkawmnaah hian Mizoram Chamber of Commerce and Industries hotute chuan Mizoram mamawhte an thlen a, Mizorama Autonomous District Council pathum CADC, MADC leh LADC-te chuan anmahni huam chhung theuha sum leh paia an dinhmun leh an harsatnate an thlen a. Mizorama political party hrang hrang ZPM, MNF, Mizoram Pradesh Congress Committee, AAP leh BJP te chuan tawngkam leh ziakin Mizoram mamawhte commission hmaah hian an thlen bawk.
Anni bakah local body hrang hrang – AMC, Lunglei Municipal Council, Aizawl City Local Council Association leh All Mizoram VC Association-te pawhin an dinhmun theuhte thlenin, tlawmngai pawl hrang hrang aiawhin MHIP leh CYMA ten commission an kawm bawk.