Israel Prime Minister Benjamin Netanyahu chuan Pathianni khan Israel chu ‘eng hunah pawh’ Gaza Strip rûn leh turin a inbuatsaih reng tih a sawi.
Netanyahu-a hian an indo chhan ber chu ‘inbiakna emaw, thil dang hmang emawin’ an tihlawhtling ngei ngei dawn tih a sawi a ni.
Combat officer-te puala hun a hmannaah prime minister chuan, “Eng hunah pawh che chhuak leh thei turin kan inbuatsaih,” a ti a. He thu a sawi hma ni chiah, Inrinni khan Gaza-a Hamas nena inkahhai an puan mekah Israel hian Palestinian lung in tang a kawl a chhuah ve turte chu a chhuah ve duh lo a ni.
“Gaza-ah hian Hamas-a an mi pawimawh tak tak kan dah tha tawh a; mahse, rinhlelh rual lohvin kan tum chu a zavaiin kan tihlawhtling dawn a, inbiakna hmang emaw, kawng dangin emaw kan puitlin ang,” a ti.
Tar lan tawh thin angin Gaza thununtu hel pawl, Hamas chuan October 7, 2023 khan Israel beiin mi 1,200 chuang an thah bakah hren turin mi 251 an hruai a. Hemi phuba la hian Hamas chhut chimih tumin Israel hian sipai chakna hmangin a bei let a ni.
Thla 15 an indo hnu leh Gaza chu nasa taka a chhiat hnuah US leh Egypt palaina azarah inkahhai inremna siamin January 19 atang khan an kalpui tan a. Thawh lia kalpui tura duan inkahhai thawh khatna kal mekah hian Hamas-in an mi hren chhuahin Israel-in Palestinian lung in tang a kawlte a chhuah ve bawk.