Aizawl: Aizawl Municipal Corporation (AMC) chuan nimin chawhnu khan local council thlan thar lawmpuina leh orientation programme an hmang.
Vana pa Hall-a hun hmanah Aizawl Mayor Lalrinenga Sailo chuan local council-te chu AMC-ah an mamawhte thlen tam tur leh Aizawl khawpuia hmasawnna hnathawh kawngah thawhpuiah a sawm.
Municipal Commissioner Joseph H. Lalramsanga kaihhruai inkawmah hian Aizawl Dy. Mayor R. Thanglura leh Corporator Rosiamngheta ten thu an sawi a. LC tharte aiawhin Durtlang, Dinthar leh Chawnpui LC Chairman-ten thu an sawi.
Laltlanzova Khiangte, Executive Corporator pawhin thu sawiin AMC-in in sak a control chu duh duh dana in an sak loh nan leh lei laih control a nih chhan chu duh duh dana lei an laih loh nan a nih thu a sawi a. Development hna an thawhin bazar, parking, bawlhhlawh khawn etc. ngai pawimawh hmasa turin LC-te a chah bawk.
Thawh hnihnaah Lalremruata Kullai, Joint Municipal Commissioner-in local council mawhphurhna chungchang a sawi a, HT Lalropuia Finance & Accounts Officer-in sum enkawl dan zirtirna a nei thung.