Khelmual lamah an che fuh hleithei lo a, khelmual pawn lamah pawh Manchester United dinhmun a fuh bik chuang lo. Player leina vela an leiba a tam hle a, leiba an ngah ber tum niin an sawi.
Manchester United hian player lak luhna atan pawisa an ba hnem hle a, an leiba zawng zawng hi £390 million niin, heng zinga £200 million vel zet chu thla 12 chhunga pek tlak tur a ni.
Tun hnaiah khan United sum dinhmun hi puanzar a ni a, rilru hah belhchhahtu a ni chiang hle a. An club sum lak luh a tlahniam nasa a, an inkhel tihchhuah man pawh a hmaa an lak luh chanve vel chauh a luh bakah an sumdawnna atanga hlawkna an hmuh pawh nasa takin a tlahniam bawk.
Erik ten Hag an ban hnua sum an pek te, Ruben Amorim an rawihna sum te chu a tam tham hle a, kum tina an sum hloh hi a tam tham viau mai a, Glazer ho hnuaiah leiba an neih belh nasa hle.
Tunlaia player an lei danah vawi khata a man pek tlak vek a ni lo tlangpui a, kum eng emaw zat chhunga pek tlak tura inremna te an ziak fo thin a. Chutiang deuh chuan Manchester United pawhin player eng emaw zat an la lut tawh a, an player lakna man hi tlem tlemin an rul ve reng hlawm a ni.
Kum thum kal ta chhung khan player lak luhna atan Manchester United hi an inseng hnem hle a, anni aia player man atana sum seng hnem chu Chelsea leh Paris Saint-Germain te chiah an ni a. Red Devils hian 2022 atang khan player man atan £570 million chuang an hmang a, tun season chhung ringawtin £200 million an hmang tling a, Ten Hag hnuaiah Leny Yoro, Matthijs de Ligt bakah Manuel Ugarte te an la lut a ni.
Khawvela football club zinga pawisa hmang nasa ber pawl ni mah se khelmualah an pawisa hman hnemin awmzia a nei lo hle a. An coach ni mek Ruben Amorim phei chuan Manchester United chanchina team chhe ber nia a ngaih thu a sawi chhuak hial a ni.