Aizawl: 16th Finance Commission Chairman Dr. Arvind Panagariya chuan sorkar laipuiin state-te sum a pek danah mipui cheng tam dan azira chhut ni mah se, Mizoram tan sum pek tlem a nih chuan loh thu a sawi.
Thawhtanni khan Dr. Panagariya chuan Aijal Club-ah thuthar thehdarhtute kawmin 16th Finance Commission kalphung hrang hrangte a sawi fiah a. Kum nga danah India president-in commission a ruat thin tih a sawi a. Heng commission member-te hian state hrang hrangte dinhmun a zirchian hnuah sorkar laipui leh state-in chhiah leh leh thil dang atanga sum a hmuhte chu state 28 leh UT pariatte hnenah rualkhai taka sem thin a nih thu a sawi.
Dr. Panagariya chuan commission-in state hrang hrangte tlawh kuala an mamawh leh dinhmun hrang hrangte an zirchian hnuah sorkar laipuiin state sorkara sum rualkhai taka sem tur hian rural leh urban body te, disaster relief grant leh education grant bakah thil danga then a nih thu a sawi.
Zawhna chhangin 16th Finance Commission Chairman Dr. Panagariya chuan state sorkar sum indaih lohna phuhru tura sorkar laipuiin state sorkar sum a pek thin, post devolution deficit grant pek chhunzawm a nih leh nih loh chungchangah state hrang hrang an zirchian hnuah thutlukna siam a ni chauh dawn tih sawiin, “Tun dinhmunah pek chhunzawm emaw, tihtawp emaw, sum pek dan tur hi sawi lawk theih a ni lo,” a ti.
Sorkar laipuiin state-te sum a pek danah mihring chen tam dan a zir chhut ni mah se Mizoramah mihring cheng tlem deuh mah se, sum pek tlem a nih chuan loh thuin, Dr. Panagariya hian a chhang.
Sum leh pai harsatna avanga Mizoramin a neihchhun, Lengpui Airport enkawl hautak avanga midang kuta hlan tumna lak atanga chhanchhuah dan a awm em tih zawhna chu, Indian Airforce (IAF) kuta hlan duh lotute duh loh chhan a hriatthiam loh thu sawiin Dr. Panagariya, “IAF chu ram dang ta ni lovin, India ta a ni. China airport a ni dawn lo,” tiin, IAF nena airport intawm nei state dang an awm thu a sawi.