Bhutan Badminton Federation Open Badminton Tournament 2025-a Mizoram atangin player inlan palite chuan gold medal an dawng vek!
Zirtawpni atanga tan, Thawhlehnia Pheuntsholing-a inelna hi Badminton World Federation (BWF) puihna leh hriatpuia khelh niin India atangin – Maharashtra, West Bengal, Assam, Nagaland leh Mizoram chuan shuttler an tirh bakah Singapore, Nepal leh Thailand player an inlan ve bawk.
Tournament-ah hian Mizoram atangin pali an inlan a, an champion theuh va. Mipa maltanah Joseph VL Ringngheta, Kulikawn, Mission Veng Badminton Club (MBC) a champion a. Joseph-a hi men’s doubles-ah Steven Lalhriatpuia, Kulikawn (MBC) nen tangdunin gold medal an la bawk.
Veteran (40+) men’s singles-ah Lalmuanawma, Hlimen, Mizoram Police Badminton Club (MPBC) chu a champion a, Muanawma hi veteran men’s doubles-ah H. Lalnunsiama, Saron Veng, Saron Badminton Club (SBC) nen an champion bawk.
Mizoram Badminton Association (MBA) chuan India ram pâwn thlenga Mizo tihmingthatu leh Mizote badminton khawvela tilartu Mizo shuttler-te a chhuangin lawmman pakhatna an la vek thei chu lawmawm an tih thu an sawi a. India leh Mizoram tihmingthatu ni zel turin duhsakna a hlan nghal bawk.