Khua a ro tan a, a ro chho leh telh telh mai dawn bawk. Lo nei mite tan thlawh hma an lakna turin lo vah leh hal an la hmabak bawk nen, kangmei chhuak thei lakah fimkhur leh zual a ngai dawn hle mai.
Kangmei hi nitin a kan tawh theih leh chumi tichhuak lo tura inven reng ngai kan ni a, inzirtirna pawh nasa lehzualin nei reng ila a tha awm e. Zial zu mi leh zin veivakte tan kawng laka meizial zuk bung tihlum lo a kan paih mai mai hian kangmei nasa zawk a thlen thei a, khua a ro chhoh telh telh avangin ho lam deuh emaw kan tih hian hlauhawm leh pawi nasa zawk a thlen thei a ni.
Tin, khawvawh deuh lai pawh hian kan meilum aina mei timit tha lova kalsan hian pawi nasa zawk a thlen thei a, kan electric wiring te a fel em tih enfiah ngun bawk ang u. Kangmei hi awlsam taka chhuak thei a ni a, kan fimkhur tawk loh avangin kangmei nasa zawk a lo chhuak fo tawh thin bawk a, naupang atanga puilting thleng hian inzirtirin, inhrilh ngun a tha hle mai.
Kumtin thal khawro lai kan paltlang ngei ngei a, kan theih ang tawka inzirtirna kan pe chung pawh hian invensen lohna chin hi chu kan nei nameuh mai. Mahse, kan harsatna tawh tam zawk hi chu keimahni chochhuah a nihna hi a awm tam khawp mai. Fimkhurah fimkhur luat a awm lo a ni ber e.
Kangmei vanga in leh lo chan tam tak an awm tawh a, mihring nunna hial pawh vawiduai lo a lo la tawh bawk. Chuvang chuan fimkhur takin khawsak tum ila, kan meizial zung bang, kan meichhemna te tihlum lo chuan kalsan lo ila, zin mite pawhin khaw kar kawngah meizuk bung tihlum lo chuan paih mai mai lo bawk ila, kan in leh a velah kangmei chhuak thei a awm em tih enfiah ngun ila, midangte tih turah dah ngawt lovin keimahni theuh hian fimkhur hna thawk ila, helama hmalatu pawl leh kohhran, sorkar te i thawhpui thiam zel ang u.