Ni 45 chhunga mi vaibelchhe 63 chuang an pungkhawm hnuah Prayagraj, Uttar Pradesh-a Hindu sakhaw kûtpui, Maha Kumbh 2025 chu Nilaini khan a tawp ta.
January 13 atanga tan mela hi thenkhat chuan mi vaibelchhe 40 chuangin an tlawm niin an sawi a, a tlem zawk pawh hi ni se mihring punkhawmna lian ber a tling tawh tho va. Hetih lai hian Uttar Pradesh sorkar chuan Thawhtanni thleng pawh khan mi vaibelchhe 63 an tling tawh niin a sawi thung.
Uttar Pradesh Chief Minister Yogi Adityanath chuan Triveni Sangam-ah mi vaibelchhe 63.36 chuang an inbual tawh niin X-ah a tar lang a. Thawhtanni bikah chauh pawh khan vaibelchhe 1.3 chuangin an tlawh niin a sawi.
Maha Kumbh Mela 2025 neih chhung hian President Droupadi Murmu, Prime Minister Narendra Modi leh politician langsar, lemchang thiam leh sumdawng lian tam takin tlawhin Sangam-ah an inbual hlawm a. Thawhtanni pawh khan lemchang thiam, Katrina Kaif leh Akshay Kumar te pawh an kal.
Mela neih chhung hian chhiatna pawh a thleng nual a, kangmei a chhuah bakah innek buaina leh lirtheia chetsualna a thleng.
Chhiatna thleng lian ber chu Hindu ni pawimawh bik, Mauni Amavasya an tih, January 29 zing vartiana Sangam bul lawka inbual ngei tum mi nuai tel pungkhawm chu innek buaiin mi 30 vel an thi a, mi 60-in hliam an tuar.
Kumbh Mela hi Hindu sakhaw lehkhabu hlui ber pakhat, Rigveda atanga intan tawh niin ‘Kumbh’ tih hi vanthengreng tuifinriat (Sagar Manthan) atanga notung hmanga nunna tui sawina atanga chhuak a ni a. Ni 12 chhung indona awmin hei hi mihring kumah kum 12 a ni a, notunga nunna tui chu leiah hmun li —Prayagraj, Haridwar, Nashik, leh Ujjain-ah farin heng hmunte hi Kumbh Mela hmanna atan pawh tih a ni ta a ni.
Kumbh Mela hi a hrang hrang awmin kum thum danah Prayagraj, Haridwar, Nashik leh Ujjain-ah hman thin a ni a. Kum li dana hman thin chu Kumbh Mela an ti a, kum ruk dana hman chu Ardh Kumbh Mela an ti thung.
Kum 12 dana hman thin, Purna Kumbh Mela a awm bawk a. Tuna Prayagraj-a an hman mek hi chu Maha Kumbh Mela niin an ngaihhlut ber a ni a, kum 144 danah chauh a awm nia sawi a ni.