Mizoram Poor Federation chuan ration buhfai latuten an lak zat tur dik tak leh buk tling an lak theih nan sorkarin ruahmanna a siam chu a tul dan ang zela an bawhzui dawn tih an sawi.
Nimina Aizawl Press Club-ah thu thar thehdarhtute an kawmnaah Mizoram Poor Federation hruaitute chuan khaw tinah mi retheiten an chanvo tur dik tak an chan leh chan loh hriat chian an duh avangin Supply Ministeer B Lalchhanzova an kawmin thahnem a lo ngaihzia an hriatin an lawm hle tih an sawi a. Minister leh sorkar tawiawm tura a sawmna chu lawm taka pawmin naktukah a hmasa ber atan Champhai district-ah bul tanin mi retheiten an chanvo dik tak, ration card-ah an awm leh awm loh zirchiang tura zinchhuah an tum thu an sawi.
Mizoram Poor Federation hruaitute chuan an khawsakna dinhmun azira ration card eng/pawla awm tur ni si, card vara awmte leh card vara awm tur ni tawh awm tak card eng/pawla awmte pawh an la awm thei a, an sum lakluh leh khawsak dinhmun ang zela an nihna dik tak ration card-a an neih hi a thianghlim a, an khawsak dinhmun azira card vara an insawn hian mi harsa zawkte tan hmun an kian tihna a nih thu sawiin, “Kristian kan nihna nen pawh a inmil hle a ni,” an ti.
Retailer thenkhatin ration buhfai latute hnenah thla thara buhfai an lak duh chuan thla hluiah an kutzungpui nem a ngaih thu te, thla hluiah an kutzungpui an nem loh avanga thla tharah an quota a thlen loh thute an sawi thin nia an hriat thu sawiin, “Hei hi inbumna a ni tih mipuiin kan hriat a tul a, hetiang thil hi tawk kan awm a nih chuan min bialtu DCSO-ah a zawhfiah theih zel a ni,” an ti bawk.
Ration buhfai dahna buara chungchangah sorkarin hma thar lain ration buhfai latuten buhfai an lak zat tur dik tak leh buk tling ngeia an lak theih nan godown-ah buara rihna (580 grams) hi an paih nghal tih an sawiin Mizoram Poor Federation hruaitute chuan, “Retailer-in buara rihna hi buhfai atangin an cut a rem tawh lo a ni,” tiin, buhfai latuten an lak tur zat dik tak leh buk tling an lak theih nan sorkarin ruahmanna a siam hi a tul dan ang zelin an bawhzui dawn tih an sawi.